LONEITUTE DINHMUN CHAWIKAN

Mizoram Eibar tihhmasawn nan Loneitute Dinhmun Chawikan

        Ka thu sawi tur “ Mizoram Eibar tihhmasawn nan Loneitute dinhmun chawikan” tih hi mi tam takin kan vei leh ngaihpawimawh anih avangin lo ngaithlatu zawng zawng ten rilru leh tihtakzet a lo ngaithla ruin ka sawm hmasa che u ni.

         Loneitute dinhmun chawikan tih thu hi Politician tamtakin vote zawnna atan an hman auhla a ni fo thin a. Chumi chung chuan vawiin ni thlengin Loneitute dinhmun chu chawikan a hnekin a la hniam hle reng a, chawikan chu sawi loh rahbehin kan awm zual zel zawk a ni lo maw? BAFFACOS sum kalhmangte hi han ngaihtuah chian phei chuan a lung chhiatthlak tak zet a ni. Loneitute dinhmun chu tu chawikan tur nge ni a, engti zawnga chawikan tur nge? Sawitur tam tak a awm avangin hun reilote chhung chuan kan sawi zo seng dawn lova, a tlangpui tlema zawng han sawi ila.

      1.    Sawrkarin sum leh p;ai leh thiamna hmangin Loneitute dinhmun chawikan hna a thawhnaah hian a duhthawh awm hle mai. Kan State Budget han enchian hian kan ram mipui 80% vel lai mai Loneitute chanvo a tlem tham em em a ni. Chutihnaklaiin kan sum ruahman hian a thawh tur dik tak a thawk reng em? Tih pawh hi hriatchian tul tak a ni. Loneitute dinhmun chawikan a nih ngei theihnan Budget tam zawk dah hi a tul tak zet a ni.

        Loneitute dinhmun chawikang tur hian Sorkar department ah thawktu mi tam tak ken nei a, heng kan hna thawktute hian huan lo ram neitute hi ngaih pawimawh berah min nei reng em le..? Loneitute tamber hian Department dawr hi kan chak vak lo niin a lang a, kan in mihrang en lutuk a ni mai thei. Departmen a thawktute pawh kan inbihchian fo hi thil tul tak a ni ang. Tin, Loneitute hian kan chanvo diktak pawh hi kan hmupha lo fo niin a lang  bawk.

        Loneitute hi mimawl te te kan nih hlawm avangin zirtir leh kaihhruai kan mamawh em em a, kan mi thiamte hian tihdan tur rinngam min zirtir sela, an thiamnate pawh hi min hlan chhawngin an zorzote hi kan chak ve em em tawh a ni. Kum hei lehchen hi enchhin reng rengin kan awm a, kan mithiamte hian heti tak hian aw... ! Tia min kaih hruai hlan a nghahhlehawm hle mai.

         Loneitute pual hian Workshop / Seminar te chu siam a ni ve thin a, amaherawhchu a hautak ang hu hian Loneitute tan hlawkpui ahar duh hle a ni. Department a thawktute hian kan huan loramte hi a hmun ah ngei han tlawhin, a zau hlawm te te leh a kahw mal ang te pawhin a hmunah ngei hian min han zirtir sela kan Buh leh thlai enkawl dante hi zirtlang thin ta ila, chut tang chuan ruahmanna (Plan) mumal tak siamin awmze neiin hna kan thawk tawh ang a, Loneitutenen inkawmngeihna leh thawh hona tha zawk a lo piang anga, hei hian LOneitute dinhmun chawikan naah min hruai lut ngei ang. Kan Department a thawktute hian kan huan lo ramte fanga, min han tlawh kual tur hian Facility an nei thalo a nih p0awhin, Sorkarin an mamawh ang chu ruahmansak ngei nise.

          2.    Thlai chi leh Thlai tiak chungchangah hian sawitur tam tak a awm a, thlai chi a hun taka hmuh leh a chi dik leh tha ngei in pek hi a pawimawhzia chu kan sawi zing tawh hle mai. Amaherawhchu vawiinni thlengin a hun takah thlai chi leh thlai tiak hian huan lo ram neitute hnen a la thleng thei lof o hi chu htil pawi tak a ni, chumai ni lovin thlai chi hlui leh dik tawk lo chungchangah; Balhla chi aiah Changel tiak, Limbu tiak aiah Serfang dawn chang te kha kan nei thin a. Hemi avan g hian sum leh pai leh tha thlawn tam tak awmzeia nei lovin kuthnathawktuten kan khawh ral a ni.

           Tin, thlai tiak sem chungchangah hian a hlui leh a vuai chhia lutuk tawh a awm fo thin a, hemi kawngah hian Supplyer hranpa awm lovin Department hotute kaihhruaina hnuaiah Nursery siam ani sela eg. Sapthei leh Thingfanghma te hi Sorkarin a ching tur te khua leh zauah te hian hmun rem chang tha, tui awm thatna ah Nursery tha tak siam nisela, thlai tiak hlui lutuk leh vuai chhia tawh tak kan phun thin te hi a lo reh tawh ang a, huan lo ram neitute tan hlawhtlinna nasatak a lo ni dawn a, hemi kawng a kan sum sen te hi a lo tglem zawk bak ah sum indaih zawkin hna a thawh theih dawn a ni. Tin, thlai chi uluk chungchangah hian kan Mizo Pi leh pute  atang tawhin a chi tha leh dik chin hi hlawhtlinna bul a ni tih kan lo hriat tawh avangin, entirnan - Vaimim te pawh a chi tur chu a kawm tha deuh kan dah hram hram thin a, Buh chi tur pawh Buh zem a mi rut chhuak mai lovin, Buh lak lai atangin a vui tha tha lawrin a bik takin ka lo ruahman thin a ni. Kawi pawh a kawm a that leh a rah a tha an lo tih hi a dik hle mai.

           3.    Loneitute dinhmun chawikanna atan pawimawh em em mai chu kalkawn (Agriculture Link Road) a ni. Mizoram hmun tam takah a hming chuan Agriculture Link Road hi siam a ni nual a, amaherawhchu enkawl zui a nih loh avangiin hmun tamtak chu awmzia nei lovin a awm me a ni. Sorkarin kalphung thar Organic Farming a puang a, hengte hi a hlawhtlin tak tak na tur chuan Link Road a pawimawh, kum hnih khat leka chhe leh mai mai tur ni lovin kal kawng ro tling tur siam ni ngei sela, nasa takin Loneitute dinhmun chawi kan a ni ngei ang.

            Loneitute pualin Excarsion neih fo hi thil tul tak a ni. Mi hnam leh mi ramin an thawh dan leha an lo hlawhtlin dan han hmuh hian Loneituten zirtur leh hmasawnna tur tam tak kan nei thin a, hei hi ram leh hnam pumpui tan hlawkna a ni. Hun tamtakah Farmers’ Tour ni si hian Farmers tel manglo a kal a awm fo thin niin a lang a. Hemi kawngah hian Loneitute pual a nih avang ngeiin Department lam atang pawhin a hruaitu atan mi pahnih pathum kal nise a tawk hle in a lang.

           A tawp berah chuan Bazar chungchangah hian kan Mizoram khawpui hrang hrangte han en hian Bazar hi kan nei tha tawk lo hle a, a bik takin Kuthnathawktu tamberte kan in chhun khawmna Aizawl bazar pui (Subzi Bazar) kan tih mai hi tun aia mumal leh lian leh tha zawkin mahni thlaithar zuartute pawh leng vekin sakthat ni sela. Millennium Centre, cheng vaibelchhe sawmthum pali chuang senga kan sak hi a ropui hle in, sawi pawh a halwh hle a ni, hemi senso zozai te hia Bazarpui sakthatnan han hmang ta ila, Bazar tha leh awmzia nei kan lo nei ve tawh ang a, Loneitute, mirethei te te zawk, mahni thlaithar zuartute tan phei chuan khawvel thar a ni ringawt mai dawn a ni. Mipui vantlang tan pawh remchanna nasa tak a lo thlen phah bawk dawn a ni.

          Tin, thlaithar lei leh hralh thuah Loneitute chawikan nan “Contract Farming System” hi chak taka kalpui ni sela, Loneituten taima leh phur takin hna kan thawkthei dawn a ni. Hei bakah hian kan ram pumpuia kan thlai thar lei leh hralh thuah “Regulated Market (Meghalaya state in an neih ang) hi kan Aizawl khawpui sir remchangah hian pakhat tal chu nei thei ta ila, atangkai dawn em mai a, Mizoram eibawr tih hmasawnnan Loneitute dinhmun chawikanna atan thil pawimawh tak a ni ngei ang.

Ka lawm e..

R. Laltluanga,
Treasurer AMFU
Durtlang.

Time of Broadcast : 16.10.2006, 6:35 AM

NANG MALSAWMNA NI ANG CHE

Valedictory Sermon
NANG MALSAWMNA NI ANG CHE
Gen. 12:1-5, Lk. 10:30-37

Upa R. Laltluanga
Chairman Kalchuak
Durtlang Pastor Bial

         Thuhmahruai : Pathian khawngaihna avangin Durtlang Pastor Bial Inkhawmpui pawimawh tak mai, kum 2006-ah Bial Chairman-a ka awm hi ka lawm h le mai. Leitan Pastro Bial indan kum tak mai a lo ni a, hei hi ka tan chuan vanneihna ropui tak a ni. Durtlang Pastor Bial chanchinah hun pawimawh leh kan chhinchhiah reng tur kum a ni. Chak lo tak chungin ka thawhpuite tawiawmna azarah ka hun ka lo hmang zo ve thei hi Kohhrante min tawngtaipuina avang a ni tih ka hriatin Pathian leh a Kohhrante chungah lawmthu ka sawi a ni. Mihring famkim lo ka nih avangin tlin lohna tam tak ka nei tih ka inhria a, khawngaihtakin in mi ngaihdamna ka ngen a ni.

         Durtlang Pastor Bial inkhawmpui vawi 84-na thlengtu Durtlang Vengthar Kohhrante an inbuatsaih nasa hle mai. Pathianni kal ta ni 25.3.2007 khan kan Pastor nen Bial fangin kan va kal dun a. Rin loh takin Chawhnu Inkhawmah thu ka sawi leh nghal a; ka lawm em em a ni. Zaninah hian ka beisei aiin thualchhung lam hmal ka hmu tlem deuh va, Gallery lam te pawh kan khak hial ka lo ring deuh va. Kan Bial chhung Kohhran pasarih 7 lai ni thin kha, tunah chuan Kohhran pathum 3 chauh kan ni ta si a. Kan Bial chhung Inkhawmpui hrang hrang kan neihahte a thlengtu Kohhran apiangten Pathian biak inkhawmah thahnem kan ngaih deuh deuh a tul hle dawn a ni.

         Aw le, kan thupuiah lo lut tawh ila, zanina kan thupui chu NANG MALSAWMNA NI ANG CHE  tih a nih kha. Malsawmna tih ih tawngkam hausa tak mai, thumal pahnih khat maia han sawifiah sen a ni lova. A phenah hian thu thuk leh ropui tak a inphum a. Ringtute tan Pathian nun tawmpuina lam vanneihna leh nihlawhna lam sawina niin a lang. Mite an thatna tura tihsak, thil siam dangte tana thil tha tih, a tha apiang induhsak, taksa leh thlarau lam nuna malsawmna keng tel a ni.

          Pathianin Abrahama hnena duhsakna leh chawimawina ropui a tiam chu - Malsawmna thlentu nihna hi a ni tlat mai. Keini mihring lam danah chuan malsawmna dawngtu nih hi duhsakna ropuia kan ngaih a ni. A inang lo hle mai ti rawh u. Keini chuan a dawna dawn hi kan duh a. Abrahama kotu chuan mi dangte tan pe chhuaktu, a peka petu a ni a duh chu a ni. Pathian chhiarkhawp leh mihirng lam chhiarkawp chu a inang thei lo a ni.

          Abrahama hian a chenna ram leh a chipuite kalsan mah sela, Pathianin hnam ropui zawkte hotua siam a tum a. Mihring lam dana beisei awm tawh lo, kum 75 mi ni tawh mahsela, fapa peka a awm tur thu a hrilh a ni. A pa In leh ro chan tur zawng zawngte kalsawn mahsela, khawizu leh hnute tuia luang ram, malsawmna chhiar sen loh pekin a awm dawn a. Chu mai a la ni lova, “Nangmahah chuan khawvela mi hnam tin an la thawveng  ang”a ti. Abrahama atang chuan khawvela lo piang chhuak reng rengin an la hmuh loh Messia, Chhandamtu an la hmu dawn a. Khawvel hnam tinin Nunna leh Hlimna, chatuan daih chu an la chang dawn a ni. A va lawm awm em

         Abrahama kohva a awm lai hian thuawih takin rinnain a kal tawp mai a, a rinna thukzia leh a huaisenzia kan hmu thei a ni. Ringhlel miah lovin Lalpan a kohna chua  chhang nghal a ni. Chutiang mi a nih avang chuan Lalpan Abrahama chu a en zui reng a, thih hlauhawm leh mualphona te pawh a tawk ve thin niin lang mahse, Lalpan a theihnghilh lo. Abrahama chungah Lalpa mit chu a fu reng a, ‘Abraham hlau sun, kei hi i phaw leh i lawmman nasa tak ka ni asin. Van lam khi en teh; Arsite khi i chhiar thei em? I thlahte chu khi ti zat khi an la ni ang’tiin Lalpan a bia. Abrahama chuan a ring mai a ni. Zaninah hian keini vawiina ringtute hian Abrahama nunah hian zirtur kan va ngha tak em. Lalpa thu a awih em a vangin a fapa halral thil hlana a hlan dawn pawh khan a thlakna tur chu thing buk atangin Beram pachal a rawn pe mai a nih kha.

         Abrahaman Lalpa chu a pawmchilh a, rinnain a vuan tlat a, chuvangin Lalpan a vengin a humhalh tlat a ni. Sam 33:18-ah chuan ‘NGai teh, Lalpa mit chu amah tihtute chungah chuan a fu reng thin a ni, a ngilneihna beiseitute chungah chuan’Zanina kan thupui hi tunlaia kan Kohhranin kan mamawh, rawngbawltuten kan hriat chian tul tak niin ka hria. Kan ram dinhmun chu kan hmu a, ni tina kan nunho dan pawh sawi tam a ngai awm lo ve. Kohhranah te, khawtlangah te, political dinhmunah te hian kan rilru put dan chu a lang chiang tawh hle a ni. Malsawmna dawngtu nih kan duh a, thlarau lam thil thleng pawhin a pe chhuaktu nih ai chuan, a dawngtu lam nih kan duh a. Mi dangten harhna an chan tur lam ai chuan, mahni lam harhna kan tuipui zawk hle a. Khawtlang thilah pawh mite hamthatna tur lam ai chuan, mahni hamthatna lam kan zuan nasa hle chu a nih hi.

          Politics lamah phei chuan mi chanai chan dan thiam, mahni chan hauh loh tur chan dan hria chu nihlawhna emaw kan ti ta hial ani lo maw? Kan neih phak hauh loh tur neih chu vanneihna emaw kan ti tawh zawk a, kan chan tawk kan sit a, mi kuta sahrang awm chu kan hmu lian duh hle a ni. Mahni nihna hre lek lovin vuivainain kan khat a, malsawmna kan chan kan hmu hniam a, miten dawng hnem bikin kan hre tlat thin a ni.

         Abrahama chu Pathianin ‘Nang malsawmna ni ang che’tiin thutiam a pe a, ngun taka kan en chuan Abrahama chanbo hi a sang teh asin. Mi dangte tana malsawmna ni turin Lalpan a ko a nih chu. Nang leh kei pawh hi mite tan malsawmna kan ni thei asin. Kan rawngbawlpuite tan malsawmna kan ni em? Kan thenawmte tan malsawmna kan ni em? Kan tangkai nge kan hnawksak zawk? MI tam tak chu kan thenawmte hian pem daih sela min lo ti hle lo maw? Kan thawhpuite hian insawn daih sela min lo ti reng ang e. Kan hnuaia thawkte hian kan pension hlan te hi an lo nghakhlel hle mai a nih chuan a fel tawk lo hle ang.

          Kan pal pin dan leh kan Insak danahte hian keini rawngbawltute pawh hi kan hnung lam atang hian miin min lo kawk zui mai ang tih a hlauhawm hle mai. Keini Kohhran Upate ngei pawh hi Office lamah te hian a che fel lo hlei hlei kan lo ni mai ang e. He lai thuah hian Ziaktu pakhatin a ziak ka rilruah a awm reng thin a - ‘Sawi thiam aiin nun thiam, hriatthiam aiin zawm thiam, inhriatsiak aiin innunsiak’Kan ramah hian thusawi thiam tak tak leh hriatna zau tak tak kan tam ta hle mai. Amaherawhcu kan nun a chep tulh tulh a ni mai lo maw?

        Kohhrana kan rawngbawlna kawng hrang hrangahte hian midangte tan malsawmna ni turin Lalpan minko tih kan awih em? Malsawmna dawng tur chauh vin em ni rawng kan bawl? Engemaw ti zawng talin mi dangte tan malsawmna thlentu kan ni thei tih i hria ang u. Ringtu nun kalkawng hi kan Bible atanga kan en hian mi dangte tana nun, midangte tana thil tha tih; mi dangte tana malsawmna ni tura koh kan nihna hlir zuk nia.

         Chanchin Tha Luka ziak kan chhiarah khan Samari mitha chanchin kan hmu a. Hei hi kan Zoram khawvel hman mekah hian a pawimawh hlein ka hre thin a. ‘A pemahte chuan hriak leh Uaiin a leih a, a tuam a, ama sa chungah a chuantir a, khualbukah a kalpui a, a enkawl ta a.’ A tuam a, vawiinah hian kan ram chhungah Ruihhlo avanga suam tawk, tuam dam ngai kan va tam em/ Hmeichhiat mipatna hman khawloh avanga suam tawk, tuam dam ngai kan va tam tak em/ KTP Durtlang Branch1955-2005 Golden Jubilee-ah Branch thupui chu ‘Nang malsawmna ni ang che’tih kan hmang a. He kan thupui hi kan tuipui zel em? Eng chenin nge kan hman zui tak le? A taka hmangtu KTP Member i ni zel ang u. Suamhmang tawk chhanchhuah hna hi a hautak hle mai. Ralkhat atang phei chuan a har khawp mai, luhchilh ngai asin. Zaninah hian kan thalaipui tamtak suala tlute tan, an tana malsawmna ni turin min ko a ni. He Samari mitha rawngbawlna hi Lal Isuan a hriatpui a, “Nang pawh chu ang bawk chuan va ti ve rawh” a ti.
   
          Zaninah hian kan za vaiin kan nitih hre rengin, nitina kan nunhona apiangah mite tan Malsawmna nih i tum zel ang u. ‘Nang malsawmna ni ang che’ Lalpan a thu kan za vai atan malsawm rawh se.
   

 Amen.

RAM NGAIHSAKTU THUKHAWCHANG

RADIO A KA THUSAWI:
Zofate hian kan ram neihchhun, Mizoram hi nuam kan tiin kan hlut hle mai. Kan hun ropui ber Krismas lo thlen dawn te hian, Zirlai leh hnathawk a awm ram pawn hmun hrang hrang a mi te kan han thlan haw khawm sung sung mai thin te hian; kan ram lak a kan rilru put hmang a ti lang chiang a. Hei hi kan hnam ze mawi leh lawmawm tak chu a ni phawt mai. Kan ram hi a la pachhiat a, kan la retheih hle chung pawh a heti taka mahni ram kan thlakhlehna hian; hma lam beiseina eng pawh min neih tir ngei ang.

Mi ramte anga ngelnghet leh intodelh ve tur a tan kan lak meknaah pawh hian, kan thehnem ngaihna pawh a in umphak tlang viau ni pawhin a hriat theih a. Mi tam takin hmasawnna lam hawi a kan thusawi dan leh kan ingngaihthlak sak tawn duh danah hian, kan lungrual khatin kan rilru put hmang pawh a rualkhai viau niin a lang a; a lawmawm hle a ni.

Chutiang kawnga kan ram dinchhuahna tura mahni zawn theuh a, tan kan lak mek naah hian, lungthu pawimawh pathumte chu i han sawi dawn teh ang.

A pakhatna atan chuan HUN (Time Resources)- Mitin mai hian thil hlu lutuk inang tlang theuhva kan neih chu, hun hi a ni a. NI khat theuh theuh mai hasusa tan a sei bik chuang lova, mi rethei darkar a tawi bik chuang hek lo; kan hman tangkai dan a inang lo mai a ni. Ram hmasawnna rahbi tukna atan hian hun hian awmzia a nei em em a ni. A hman dan kan thiam a tul a, chumi avang chuan Sapin “Time is Money” an lo ti hial reng a ni.

Entirna pakhat han sawi ila: Mi ropui leh huaisen CHiangkaishek-a hova China ram Communist tlanchhiat santu mipuite khan, Formose thliarkar a tan an han lak tak tak khan; America sorkar chakna rinchhanin, kum 10 (sawm) chhung lekin Taiwan ram ruangam chu fel leh nghet takin an din hman vek mai a. Awmze nei takin an hun hlu tak kha an hmang a, rei loteah khawvel hriatah a in tarlang hman a ni tih kan hria.

Chutiang chuan keini Mizoram pawh hi State puitling kan nih ve na pawh kum 20 lai a lo ni ta reng mai. Kan ram hmasawnna tur Rahbi kan tuk tawh leh kan hun hmanral tawhte hi a inphutawk kan ti em? MI ramte aiin muangchang lu deuh kan inti em le? Hun hmang tangkai leh hun hmang thiamn tak ram kan nih leh nih loh chu kan chhut thiam mai awm e.

A pahnihna atan chuan: Sum leh pai (Financial Resource) hi han sawi dawn ila. India Sorkar laipui atangin Mizoramin kan sum leh pai mamawhte kan dawng kumtin a. Heng sum leh pai kan dawnte hi a phu tawk ram hmasawnna rahbi tukna atan kan hmang tangkai reng em? Hmasawnbna hi van tlangin a rualkhai zawngin kan chang hmasa phawt tur nge? Mimal hamthatna leh intlansiaknain hmasawnna chu a rawn hring chhuak zawk turah kan ngai.? Zawhna pawimawh tak a ni. Leilung buatsaihna hna - Leilet siamte, Kawngtha siam leh Vantlang tana ro hlu siam kawngah te hian, kan ramin sum kan sen ral leh a taka kan neihte hi a inphu tawk kan ti reng em? Sum hi a hmanna tur dik taka hmang lova, a zuih zawnga a ral a nih vaih chuan thil hlauhawm tak a ni. Kan ram Sorkar sum hmang tute hiaqn, a hmanna tur dik taka an hman leh hman loh chu; in chhui zuina chang pawh kan hriat tan ve tak hi maw.

A lungthu pathumna atan chuan - Mihring tha leh tui (Human Resource) hi a ni a, a pawimawh ber hial awm e. Tharum lawng lawng ngawt ni lovin - finna, hriatna, thiamna leh mihring atanga chhuak thil tangkai zawng zawng hi a huam a ni. Kan ram hian Hun leh Sum chu kan hmang hnbem ham ham ta hle mai a. Mirhing hman tangkai leh daihzai lam chu kan zir a la ngai hle a ni . eg. Office hnathawkten an thawh tlem leh thawh tam dan atang hian, Human resources kan ngaih pawimawh dan chu a hriat mai. Hun leh Sum hi chu an rinawm a. Mihring erawh chu kan dawrawmin kan rinawm lo thin a ni. India Sorkar Ministry pawimawh tak - Human Resources Ministry hi kan hria a, Sorkarin a ngaipawimawh khawp mai. Keini Mizoram Sorkar hian engtin tak ngai ve maw?

Tun hma lama Thingtlang lo neiha eizawng chhungkuaah kha chuan Lo lam hna chu, Nula leh tlangval tha chak zawkte kutah a awm a. Nu leh pa chak lo zawkten an fate tha an chhawr thiam azarah hlawhtling takin Buh kham an lo thar chhuak thin a. Ei leh barah an intodelh thin tih kan hria. Tunlai kan ram kalhmangah chuan thalaite an awl a, nu leh pa tar chak lo zawkte kan thawkrim zawk ta niin a lang. Engnge a chhan ni ang? A lehlamah chuan, ram siam thatna hna hrang hrangahte hian kum lama upa te hian thangthar zawkte hi kan kian thiam lo hle niin a hriat theih a. Kawng tam takah kan thalaite hian an chanvo leh an mahni ta anga an en theih thil hi a tam lo hle a ni. Thuneituten ngaihtuahna hman thiam a tul hle a ni.

Infiamna leh intihhlimna hmuna kan thalaite nungchang han en hian, an theih ang tawka chakna (Calibre) han pho lan te an chak ve a, kaihhruaina fel tak hnuai a, ram tana tangkai ve an duh a ni tih a hmuh theih a ni. Heng kawngahte hian nu leh pate hian kan fate hi kan dip lutuk a ni thei ang em?

A tawp ber atan chuan, kan Kristian hla “Chhandamna banga inhungin” tih tui taka kan zaipui ang deuh hian, hmasawnna rahbi kan tukte  hi, amah Dr. Swaminathana thu khawchang angin - Heng bang pali (4) te hian hung ni thei se la, a duhawm ngawt ang.

(i)    Environment Friendly (Khawvel siamphung remin)
(ii)    Economically Sound (Khawsak ti phuisui zangin)
(iii)    Technically Viable (Tunlai thiamna hmang chungin)
(iv)    Socially Acceptable (Vantlang nun nena inhmeh takin)

Heng kan sawi tak thu tlemte, atlangpui chauh atang hian; ngaihtuahna hmang zui theuh turin ngaithlatu zawng zawngte ka sawm a che u.

KA LAWM E.


Dt 14.11.2006,
Telecast : 17.11.2006, Zingkar

VIETNAM LAMAH

SANGHA DIL TUR KAN PUAHCHAH MEK E

KA ZIN KUAL VELNAA KA THIL TAWN

Khawzawl lamah kan puar hle mai.

 Date 9.3.07 :  Chhura Vawkpa - Sailulak